Cum
acerrime comminus pugnaretur, L. Fabius centurio quique una murum ascenderant,
circumventi atque interfecti de muro praecipitabantur. M. Petronius, eiusdem
legionis centurio, cum portas excidere conatus esset, a multitudine oppressus
ac sibi desperans, multis iam vulneribus acceptis, manipulares suos, qui illi
confidebant, cohortatus est et eis dixit: «Quoniam me una vobiscum servare non
possum, vestrae certe vitae prospiciam, quos, gloria adductus, in periculum
deduxi. Vos, data facultate, vobis consulite». Simul in medios hostes irrupit
duobusque interfectis reliquos a porta paulum submovit. Conantibus auxiliari
suis, dixit: «Frustra meae vitae subvenire conamini; iam sanguis viresque me
deficiunt. Proinde abite, vosque ad legionem recipite». Ita strenue
pugnans, ut solebat, post paulum concidit ac suis salutem paravit.
Nessun commento:
Posta un commento