Omnes semper maxime admirati sunt
quae de Ventidio Basso scripta sunt;
narrant enim
eum Picentem fuisse genere et loco humili,
et matrem eius a Pompeio Strabone, Pompeii Magni patre, bello sociali
captam cum ipso esse.
Mox,
triumphante Pompeio Strabone,
is quoque puer inter ceteros ante
currum imperatoris sinu matris vectus est;
post
cum adolevisset,
victum sibi aegre quaesivit:
comparabat enim mulos et vehicula,
quae magistratibus,
qui sortiti provincias erant,
publice suppeditabantur.
In isto quaestu notus esse
incepit
Caio Caesari
et cum eo profectus est in Gallias.
Tum,
quia in ea provincia satis naviter versatus erat
et deinceps civili bello mandata pleraque inpigre et strenue fecerat,
non modo in amicitiam Caesaris, sed ex
ea in amplissimum quoque ordinem pervenit;
mox tribunum quoque plebis ac deinde
praetorem creatus
atque in eo tempore iudicatus est a senatu
hostis cum Marco Antonio;
post vero
coniunctis partibus
non pristinam tantum dignitatem
recuperavit,
sed pontificatum ac deinde consulatum
adeptus est.
Nessun commento:
Posta un commento