Il leone, l’asino e la volpe (struttura)

Λέων καὶ ὄνος καὶ ἀλώπηξ,

κοινωνίαν ποιησάμενοι,

ἐξῆλθον πρὸς ἄγραν.

 

Πολλῆς οὖν θήρας συλληφθείσης,

προσέταξεν ὁ λέων τῷ ὄνῳ

διελεῖν αὐτοῖς.

Ὁ δέ,

τρεῖς μερίδας ποιησάμενος ἐκ τῶν ἴσων,

προὐτρέπετο τούτους

ἐκλέξασθαι.

Καὶ ὁ λέων

θυμωθεὶς

τὸν ὄνον κατέφαγεν.

Εἴτα τῇ ἀλώπεκι μερίζειν ἐκέλευσεν.

Ἡ δέ,

εἰς μίαν μερίδα πάντα σωρεύσασα,

ἑαυτῇ βραχύ τι κατέλιπεν.

Καὶ ὁ λέων πρὸς αὐτήν·

«Τίς σε, ὦ βελτίστη, ἐδίδαξεν

διαιρεῖν οὕτως;».

Ἡ δ’εἶπεν·

«Ἡ τοῦ ὄνου συμφορά».

Ὁ μῦθος δηλοῖ

ὅτι σωφρονισμοὶ γίγνονται τοῖς ἀνθρώποις τὰ τῶν πέλας δυστυχήματα.