Achivi cum per decem annos Troiam capere
non possent, Epeus monitu Minervae equum mirae magnitudinis ligneum fecit eoque
sunt collecti Menelaus, Ulixes, Diomedes, Thessander, Sthenelus Acamas, Thoas,
Machaon et Neoptolemus; et in equo scripserunt: «Danai Minervae dono dant»,
castraque transtulerunt Tenedum. Id Troiani cum vidissent, censuerunt hostes
abisse; Priamus equum in arcem Minervae duci imperavit, feriatique magno opere
ut essent edixit; id vates Cassandra cum clamitaret, inesse hostes, fides ei
habita non est. Quem in arcem cum statuissent et ipsi noctu lusu atque vino
lassi obdormissent, Achivi ex equo aperto a Sinone exierunt et portarum
custodes occiderunt, sociosque, signo dato, receperunt et Troiam ceperunt.
Nessun commento:
Posta un commento