Confecto proelio, tum omnes videre
potuerunt quanta audacia quantaque animi vis fuisset in exercitu Catilinae. Nam
fere quem quisque vivus pugnans locum ceperat, eum, amissa anima, corpore tegebat.
Pauci autem, quos cohors praetoria disiecerat, paulo diversius, sed omnes tamen
adversis vulneribus conciderant. Catilina vero longe a suis inter hostium
cadavera repertus est, paululum etiam spirans, ferociamque animi, quam habuerat
vivus, in vultu retinens. Postremo ex omni copia neque in proelio neque in fuga
quisquam civis ingenuus captus est: ita cuncti suae hostiumque vitae iuxta
pepercerant. Neque tamen exercitus populi Romani laetam aut incruentam
victoriam reportaverat. Nam strenuissimus quisque aut occiderat in proelio aut
graviter vulneratus discesserat.
Nessun commento:
Posta un commento