Cum Cyrus, Babylona oppugnaturus, festinaret ad
bellum, Gynden, late fusum amnem, vado transire conatus est, quod vix tutum est
etiam cum sensit aestatem et ad minimum deductus est. Ibi unus ex iis albis
equis qui trahere regium currum solebant abreptus vehementer commovit regem;
iuravit itaque se amnem illum eo redacturum esse ut transiri calcarique etiam a
feminis posset. Hoc
deinde omnem transtulit belli apparatum et tam diu adsedit operi donec centum
et octoginta cuniculis divisum alveum in trecentos et sexaginta rivos
dispergeret et siccum relinqueret. Periit itaque et tempus, magna in magnis
rebus iactura, et militum ardor, quem inutilis labor fregit, et occasio
adgrediendi hostes imparatos, dum ille bellum indictum hosti cum flumine gerit.
Nessun commento:
Posta un commento