Narrant Cyrum, subacta Asia et universo Oriente in
potestatem redacto, Scythis bellum movisse: erat illius gentis regina Tomyris.
Cyrus, traiectis copiis, cum aliquantisper in Scythiam processisset, castra
posuit. Deinde, simulato metu, refugiens, castra deseruit et vinum atque ea,
quae epulis necessaria erant, reliquit. Quod cum nuntiatum reginae esset,
adulescentulum filium cum tertia parte copiarum mittit prehensum Cyrum.
Adulescens, cum ad castra Cyri venisset, omissis hostibus -incredibile
dictu-cum suis militibus se vino et epulis dedit: sic tradunt prius ebrietate
quam bello Scythas victos esse. Nam Cyrus, his rebus cognitis, noctu revertens
Scythas in somno deprehensos cum reginae filio interfecit. Amisso tanto
exercitu et filio, regina animum ad ultionem intendit hostesque, recenti
victoria exsultantes, pari fraude circumvenit. Nam Tomyris se refugit, simulata
diffidentia propter cladem acceptam; sic Cyrum ad angustias perduxit et multos
Persas trucidavit.
Nessun commento:
Posta un commento